Skal me få fleire til å vurdera Ryfylke som ein stad å jobba og bu, må me klara å visa fram moglegheitene som faktisk finst her. Det er ein viktig del av tanken bak Heim te Ryfylke.
– Heile poenget med Heim te Ryfylke er å samla moglegheitene i regionen på éin stad. Ein person som vurderer å flytta til eller tilbake til Ryfylke, skal kunna finna ledige jobbar, bustader, arrangement og informasjon om korleis det er å bu og leva her, utan å måtta leita hos kvar enkelt kommune, bedrift eller aktør, seier Janet Jørmeland, prosjektleiar for Heim te Ryfylke.
Jobbane må vera synlege
Heim te Ryfylke hentar ledige stillingar automatisk frå NAV Arbeidsplassen. Utfordringa er at mange arbeidsgivarar i Ryfylke berre publiserer stillingane sine på Finn. Desse kan me ikkje henta automatisk.
Konsekvensen er at ein del av jobbane som faktisk finst i Ryfylke, ikkje blir synlege når potensielle tilflyttarar utforskar arbeidsmarknaden gjennom Heim te Ryfylke.
Og for ein som vurderer å flytta, er det samla biletet viktig.
– Det handlar ikkje nødvendigvis berre om å finna éin bestemt jobb. Ein vil gjerne sjå om det finst fleire aktuelle arbeidsgivarar, moglegheiter for ein eventuell partnar og rom for å utvikla eller byta jobb seinare. Dersom stillingar manglar, kan ein sitja igjen med inntrykk av at det finst færre karrieremoglegheiter i Ryfylke enn det faktisk gjer, seier Jørmeland.
Eit enkelt grep frå arbeidsgivarane
Difor har me ei oppmoding til bedrifter og kommunar i Ryfylke:
Når de lyser ut ei stilling, publiser den også på NAV Arbeidsplassen.
De kan sjølvsagt framleis bruka Finn og andre rekrutteringskanalar. Men ved å publisera stillinga på NAV Arbeidsplassen også, kan den automatisk bli synleg gjennom Heim te Ryfylke.
Det gir ikkje berre den enkelte stillinga ein ekstra kanal. Det hjelper oss også med å visa fram breidda i arbeidslivet i regionen.
– Kvar ledige stilling er ikkje berre ei utlysing frå éin arbeidsgivar. Den er også ein del av historia om kva slags kompetanse, arbeidsplassar og karrierevegar som finst i Ryfylke. Når arbeidsgivarane publiserer på NAV Arbeidsplassen, hjelper dei oss med å gjera både stillinga, arbeidsplassen og regionen meir synleg, seier Jørmeland.
Har de ei ledig stilling? Publiser den gjerne på NAV Arbeidsplassen – så kan me vera med og gjera den synleg gjennom Heim te Ryfylke.
