Heilt Heim-prosjektet er ein del av ein større satsing for å gjera unge i Ryfylke betre kjent med regionen sin og arbeidslivet her.
Leiar i ungdomsstyret, Anne Langeland Bratthammer, seier:
– Me er utruleg glade for denne støtta som gjer det råd for oss å realisera viktige tiltak for unge i Ryfylke. Heilt heim vil gjere det enklare for unge å halde kontakten med regionen sin, få betre oversikt over det spennande arbeidslivet regionen har og delta aktivt i utviklinga av Ryfylke.
Midlane skal vera med å realisera ein del av handlingsplanen til ungdomsstyret. Den inkludere fleire prosjekt for å sikre rekruttering og tilflytting til regionen. I tillegg til Heilt heim arbeider styret no med å arrangera Ryrekrutt, eit stort nettverks- og rekrutteringsarrangement som finn stad tysdag 15. april 2025 på Fiskepiren i Stavanger. Arrangementet skal samle unge frå Ryfylke og arbeidsgivarar til ein dag fylt med fagleg og sosialt påfyll.
Arrangementet skal inspirera fleire unge til å bli betre kjent med kvalitetane i eigen region. Ungdomsstyret inviterer alle arbeidsgivarar til å vise seg fram denne dagen for framtidige arbeidstakarar. Det er store artistar på programmet – Tøfl og Isah er allereie på plass, og det blir gratis overnatting for dei første 200 som melder seg på.
Nestleiar i Ungdomsstyret, Peder Krokedal, understrekar kor viktig støtta frå Sparebankstiftinga er:
– Dette er ei investering i framtida til Ryfylke. Gjennom Heilt heim og RyRekrutt kan me vise unge at regionen har mykje å by på, både når det gjeld eit spennande arbeidsliv og i tillegg til spennande sosiale aktivitetar. Det er kjekt at Sparebankstiftelsen har trua på prosjektet vårt og utviklinga av Ryfylke-regionen.
No er det offisielle gåvekortet overrekt og dette markere ei spennande tid for unge i Ryfylke. Ungdomsstyret vil arbeida vidare med fleire prosjekt, mellom anna vidareutvikling av nettportalen Sommarjobben.no og etablering av eit trainee-program for nyutdanna i samarbeid med lokalt arbeidsliv.
Målet er å skapa varige løysingar som knyter unge tettare til regionen og bidrar til ei positiv utvikling for Ryfylke.
