– Målet har vore å synleggjera ungdommar som jobbar her i regionen, fortel Andrea.
Ho har besøkt sommarvikarar i alle slags bransjar – frå helse, idrett og reiseliv til industri, havbruk, energi og transport.
Ungdommane ho har møtt har vore frå 13 til 26 år, nokre busette i Ryfylke, andre på sommarbesøk frå studiestader.
Godt motteken ute i bedriftene
– Eg har blitt tatt så godt i mot over alt! Det har vore kjekt å få omvisningar, læra meir om arbeidsplassen og møta folk som brenn for det dei driv med, seier Andrea.
Ho legg til at ho opplever ein gjensidig takknemlegheit mellom sommarvikarane og bedriftene.
– Arbeidsgivarane snakkar varmt om ungdommane, og ungdommane snakkar like varmt om jobben sin. Mange set pris på å få ansvar og tillit, og fleire fortel at bedrifta sjølv tek kontakt for å tilby jobb – også året etter.
Godt arbeidsmiljø er viktig
Når Andrea spør kva som er viktigast i jobben, kjem svaret alltid tilbake: eit godt arbeidsmiljø.
– Det betyr mykje å ha kollegaer og leiarar som støttar deg og gir deg moglegheiter.
Ho meiner dette også er nøkkelen til å få fleire ungdommar til å jobba – og bu – i Ryfylke i framtida.
– Bedriftene må synleggjera seg, visa kva dei driv med og kva behov dei har. Og ikkje minst – satsa på ungdommane. Dei er framtida vår!
Fleire jobbar enn mange trur
Det som har overraska Andrea mest på turneen, er mangfaldet av jobbar i Ryfylke.
– Ofte kjenner ein best til arbeidsplassane i si eiga bygd, men det finst så mange spennande moglegheiter rundt om i heile regionen, seier ho.
Og om ho sjølv var 17 år i dag?
– Då ville eg kanskje søkt hos Statkraft eller Mibau Stema – eg trivst med fysisk arbeid og likar å vere ute, smiler Andrea.
