Korleis ser Ryfylke ut om ti år? Og kva rolle skal Ryfylke IKS spela i utviklinga? Me har utfordra dagleg leiar Ingrid Roth til å dela nokre tankar om framtida, moglegheitene og kva organisasjonen må våga å gjera annleis.
Frå moglegheiter til handling
Ryfylke IKS arbeider med næringsutvikling, rekruttering og mobilitet på tvers av kommunegrensene. Gjennom samarbeid mellom kommunar, næringsliv og andre aktørar skal organisasjonen bidra til utvikling i regionen.
Men kva blir den viktigaste oppgåva framover?
– Å samla menneske, kompetanse og ressursar og omsetja moglegheiter til handling og verdiskaping, seier Roth.
Ho meiner også at organisasjonen må våga å ta ei tydelegare rolle.
– Me må våga å ta større plass, utfordra etablerte tankesett og setja retning for utviklinga i Ryfylke.
Drøymer om ein region som viser veg
Når Ingrid får drøyma høgt om framtida til Ryfylke IKS, handlar det ikkje berre om kva organisasjonen sjølv skal få til.
Ho ser føre seg at måten aktørane i Ryfylke samarbeider på, kan bli eit førebilete for andre.
– Eg drøymer om at Ryfylkemodellen har blitt eit førebilete for regional utvikling, der kommunar, næringsliv og kompetansemiljø byggjer tillit, deler kunnskap og skaper resultat på tvers av grenser.
Ryfylke om ti år
Kva håpar ho så at samarbeidet har bidrege til om ti år?
– At Ryfylke er ein attraktiv og framtidsretta region med sterke bedrifter, levande lokalsamfunn og spennande moglegheiter for nye generasjonar.
Det er store ambisjonar. Og dei handlar om meir enn enkeltprosjekt og satsingar.
For Ryfylke IKS er målet å bidra til ei utvikling som skaper verdi for heile regionen, også på lang sikt.
