Heim te Ryfylke tek fart
Prosjektet Heim te Ryfylke er inne i ein ny og spennande fase. I oktober samla Ryfylke IKS representantar frå kommunar og næringsliv til workshop for å arbeide vidare med korleis Ryfylke kan bli ein meir attraktiv stad å leve, jobbe og høyre til.
Målet er å utvikle ein felles digital plattform som viser fram moglegheitene i regionen – frå jobbar og bustader til møteplassar og kvardagsliv. Løysinga skal bli eit felles verktøy for kommunar og næringsliv – eit hjelpemiddel i arbeidet med å rekruttere og halde på kompetent arbeidskraft.
Advania og Hike er samarbeidspartnarar
Workshopen markerte eit viktig steg vidare i prosjektet. Advania, i samarbeid med Hike kommunikasjon, er valt som langsiktig partnar i satsinga. Saman kombinerer dei solid teknologikompetanse, sterk design- og kommunikasjonskraft og dokumentert erfaring frå liknande prosjekt.
Advania leia prosessen under workshopen, der deltakarane diskuterte korleis plattforma best kan støtte arbeidet med rekruttering og tilflytting.
Eit felles løft for Ryfylke
Gjennom tre workshopar det siste året har deltakarane kartlagt behov, utfordringar og idear for korleis regionen kan stå sterkare i arbeidet med å rekruttere og halde på unge vaksne. Eit klart ønskje har vore å samle all informasjon om bustadar, jobbar og lokalsamfunn på ein stad – slik at det blir enklare å oppdage moglegheitene i Ryfylke.
Vidare arbeid og medverknad
Neste steg er å utvikle struktur og design for plattforma saman med Advania og Hike. Kommunar, næringsliv og Ungdomsstyret i Ryfylke blir aktivt involvert i utviklingsfasen. Målet er å skape ei plattform som både samlar og styrkjer regionen – og gjer Ryfylke til ein stad der fleire ønskjer å leve, jobbe og høyre til.
