Kunstig intelligens endrar allereie korleis me arbeider, skapar verdi og konkurrerer. Utviklinga går raskt, og for mange verksemder kan det vera vanskeleg å vita kva teknologien betyr i praksis, og kvar ein bør byrja.
På KI + MI = Framtidas konkurransert i Ryfylke får deltakarane innsikt i kva utviklinga kan bety for arbeidslivet og næringslivet dei neste åra. Samstundes blir merksemda retta mot dei menneskelege ferdigheitene som blir endå viktigare når teknologien tek over fleire oppgåver.
Målet med arrangementet er å gjera KI meir forståeleg og relevant for verksemdene i regionen. Deltakarane skal få nye perspektiv og konkrete idear dei kan ta med seg tilbake til arbeidsplassen.
To perspektiv på framtidas arbeidsliv
Lars Rinnan er ein av Noregs mest erfarne og etterspurde foredragshaldarar innan kunstig intelligens. Han har arbeidd med å skapa innsikt frå data i 30 år og har starta seks selskap innan business analytics og KI.
I foredraget «Verda i 2029» ser Rinnan nærare på kor raskt KI-utviklinga går, kva teknologiar som vil påverka næringslivet, og kva verksemder bør gjera no for å stå sterkare i åra som kjem.
Synneva Erland er leiarutviklar, kommunikasjonsrådgivar og foredragshaldar med over 15 års erfaring frå arbeid med leiarar, team og organisasjonar.
I foredraget «Når KI blir smartare, må me bli modigare» viser ho kvifor eigenskapar som dømmekraft, kritisk tenking, kreativitet, kommunikasjon og mot blir stadig viktigare. Ho løftar fram korleis kunstig intelligens og menneskeleg intelligens kan utfylla kvarandre i praksis.
Kven passar arrangementet for?
KI-arrangementet i Ryfylke passar mellom anna for:
- daglege leiarar og leiargrupper
- prosjektleiarar
- personar som arbeider med HR og organisasjonsutvikling
- personar innan marknad, kommunikasjon og IT
- tilsette i kommunar og offentlege verksemder
- andre som er nysgjerrige på KI og usikre på kvar dei skal byrja
Det er ikkje nødvendig å ha erfaring med kunstig intelligens frå før.
Praktisk informasjon
Dato: 27. august 2026
Tid: Kl. 10.00–14.00, registrering frå kl. 09.30
Stad: Smaken av Ryfylke, Hjelmeland
Pris: 1 500 kroner per deltakar, inkludert lunsj, pausemat og kaffi
